(সিলেট)
আমার গাউত যাইতায়নি ছুঙ্গা ফিটা খাইতায়নি
খাছা ফাত্তির চা খাওয়াইমু মজা খরি খাইবায়নি।
আমার বাড়ির খান্দাত আছে খমলার ও বাগান
ফাড় তাকি নামিয়া আইছে সুরমা গাঙ্গর বান
অউ সুরমা গাঙ্গ ফার অইছলা
শাহজালাল ইয়ামনী ।
আল্লার কুদরত দেখবায় তুমি মাধবকুণ্ডত গিয়া
ঝর্ণা তাকি ফানি লামের গড়ইয়া গড়াইয়া
আরো আছে হরিফুরর তেলর ও বান্ডার
জলালী খইতরে ভরা শাহজালাল মাজার
জল ডুফর আনারস ভাই
খলইত খরি নিবায়নি।
আখালুকির আওর দেখবায় দেখবায় ছা বাগান
উছা উছা ফাড় দেখবায় আসমানর লাখাইন
সাদা সিদা মানুষ আছইন সাদা তারার মন
তুমায় ফাইয়া খুশি ওইবা জুড়াইব নয়ন
তারার খতা হারা জীবন
তোমার মন তাখবনি ।
